قلب الوطن مفطوووووووور

قلب الوطن مفطوووووووور

--------------------------------------------------------------------------------

بسم الله الرحمن الرحيم


السلام عليكم ورحمة الله وبركاتة

يا مقطّعين لحم الوطن منابات
ومفرّقين على أي مجرم فات
يا موزّعين الظلم بالألوفات
قلب الوطن مفطور من اعمالكم
مصّيتوا دم الفقرا والمساكين
سكّيتوا أبواب الأمل مجانين
ملعونة أفعالكم ليوم الدين
لحن الشقا والغدر موّالكم
يا حارمين الأم م الكتاكيت
يا خاطفين اللقمة والفرافيت
يا خانقين الضحكة بالنبابيت
عدّيتوا كل الخلق عذالكم
بخّرتوا أحلام الفتى والشيخ
خلّيتوا دفاترنا بدون تواريخ
نسمع كلامكو تقولش م المريخ
الشعب عمره ما مرّ بخيالكم
نسمع كلام عن إنجازات يامة
وبقيتوا بين المفسدين شامة
صدّرتوا بنت الأصل خدّامة
ورفعتوا أهل الجهل أمثالكم
فين بس قولوا حصيلة البترول؟
دخل القنال فينه يا راجل قول؟
آدي الطواغيت كلها بتزول
من كل قلبي باقولها عقبالكم
نشّفتوا دم الشعرا والكتاب
وحرقتوا قلب الأهل والأحباب
حتى فشلتوا في حصة الألعاب
ملّينا منها والله أشكالكم
الكذب أصبح عندكم تنظير
صدعتوا راس الكل م التبرير
وبلعتوا حق الخلق بالتزوير
يا عبطا كل الدنيا شايفينكم
منظركوا بيعكّر يا بعدا بحور
كارهين صورتكم في العشش والدور
لو يوم نشوفكم نجري نطفي النور
الناس بتحسد الاعمى علشانكم
صحّيتوا جوّانا الأسى والهم
خايب على متعوس ياناس يتلّم
والله اتخنقنا يا تقال الدم
الله يكون في عونها نسوانكم



والسلام عليكم ورحمة الله وبركاتة


سجود

فيك بارك الله يعمر اشكرك على المرور الكريم