الرئيسية
من طرف manora 29/3/2008, 1:01 am
انا بصراحه مش عارف اقول ايه
حزين ، متضايق
حاسس انى تايه و ضايع
فى حاجه غلط فى حياتى
لما تشوف رسولك بيتهان ومحدش ولا على باله حاجه , ويمكن محدش يعرف
لما تلاقى مظاهره بتقول النصر لمصر وشباب لابسين احمر وعاملين علم مصر على جسمهم ووشهم
وبيشجعوا منتخب مصر فى الوقت اللى مفيش واحد منهم " فكر بس مجرد تفكير فى اللى بيحصل من حولنا " ( الا من رحم ربى)
رسولنا بيُسب ... علمائنا بيموتوا ... حالنا بقه كرب
امراض، اوبئه .... اسعار فوق طاقتنا
مفكرتش مره مين السبب فى دا كله
مفكرتش ان السبب ممكن يكون انا ؟؟ او انت؟؟
ايوه متستغربش احنا السبب فى اللى بيحصل لرسولنا
احنا المسؤلين عن اللى بيحصل فى غزه والعراق ولبنان والجولان والشيشان والصومال وافغانستان
شوف مات كام واحد شوف ,,شوف اترملت كام واحده,,, شوف كام طفل اتيتم ....شوف...شوف
طب شوف كام مريض بالسرطان ولا بالكبد ولا بالسكر ولا.. ولا... ولا .....
رسولك اتهان واتريقوا عليه واحنا السبب
الغلابه هيموتوا من الجوع واحنا السبب
عارف دا كله ليه ؟؟
عارف انا وانت عملنا ايه ؟؟
عارف ليه ربنا ابتلانا بدا ..؟؟
علشان احنا عصاه ومقصرين
المصائب عقوبة الله لنا على ذنوبنا وتقصيرنا
هلاك الأمم السابقة بسبب ذنوبها
ايوة ذنوبها
قولى بالله عليك : قريت قرآن النهاردة ,, حفظت آية واحدة ,, قريت حاجة عن نبيك
طب قولى بقى سمعت اغنية ايه النهاردة ,, طب اخر اخبار المطرب الفلانى ايه طب و المطربة دى عملت ايه فى فيلمها الجديد ...
بالله عليك ده ينفع؟ هاتقول ايه لربنا لما يسألك ...؟؟؟؟
فيه حوادث ومصائب حدثت فى الأمم السابقة عظة وعبرة لنا
"إن فى ذلك لعبرة لمن يخشى"
فشو المنكرات سبب في حلول العقوبة و الابتلاء من ربنا
انا عارف انك هتقولى ان المصائب دى قدر الله احنا ملناش فيها دخل
بس انا عاوز اقولك حاجه ان الله جعل لكل شئ سبب
طاعة الله تعالى وطاعة رسوله صلى الله عليه وسلم سبب لجلب النعم المفقودة وحفظ النعم الموجودة
أما المعاصي فهي سبب لذهاب النعم وحلول النقم بتزيل النعم الحاصلة وتقطع النعم الواصلة
المعاصي والذنوب هي أصل كل بلاء ، ومصدر كل شقاء ، ومنبع كل غضب
طب والحل ؟؟ ... لازم يكون فى حل ؟؟؟
يعنى لازم تبدأ .. لازم تفوق .. لازم تعمل وقفه مع نفسك
اتق الله وارجع له متقولش هو انا اللى كدا بس
ابدا بنفسك على الاقل علشان تلاقى حجه تحاجى بها ادام ربنا ولا هتقوله ايه ؟؟
انا بجد حزين والواقع فظيع واحنا مش حاسيين
اخيرا ....
انا كنت بفكر فى واجب عملى بإذن الله
ان كل الناس تحاول توصل الواجب ده لكل الى يعرفهم
الحي , اصحاب , أقارب ,.....,.....
طيب ايه هو الواجب
اننا نرجع لربنا و نتوب و نقول للناس كلها اننا امة قوية و ان الشباب هم المستقبل
و نحي سنة نبينا صلى الله عليه و سلم و نحاول ناخد موقف رجولة
ايوة موقف رجولة
و صلى الله على نبينا محمد و على آله و صحبه وسلم
و السلام عليكم و رحمة الله و بركاته
