خواطر ايمانية فى كلام رب البرية

السلام عليكم ورحمة الله وبركاته
ازيكم ياجماعة كلكم اسال الله العلى القدير ان تكونوا فى احسن حال وان يجمعنا بفضله ومنه فى ظل عرشه يوم لا ظل الا ظله انه ولى ذلك والقادر عليه اما بعد:
والله ياجماعة الموضوع دة خطر فى بالى من زمان بس مكنتش عارف ابدا ازاى او ممكن تقولى ان انا كسلت وانشغلت الى ان ذكرت اخت لنا فى احد المنتديات جزاها الله كل خير موضوع (من اى الفريقين انت يوم القيامة)ومن ساعتها حسيت اننا محتاجين موضوع يتكلم عن كلام الملك عز وجل وازاى نتعايش معاه
فعلا ياجماعة الواحد ساعات لما بتبقى ايمانياته عاليه وييجى يقرا القران بترد على ذهنه معانى هو ممكن يكون انتبه ليها لاول مرة وفعلا دة حقيقى ويشهد بكدة كلام الشيخ الشعراوى(رحمة الله عليه)لما كان بيذكر خواطره فى القران فعلا كان بيقول حاجات يمكن الواحد كان لاول مرة يسمعها ويمكن هو كمان(رحمة الله عليه)مكنش بيجهز الكلام دة لكن ربنا كان بيفتح عليه بالكلام دة وقتها
وعلى فكرة ياجماعة مش القران بس اللى كدة دة كمان الصلاة ومعظم الطاعات بيبقى ليها لذة الواحد مننا بيحس بيها لما بيعمل الطاعة دى ويمكن تكون هى دى لذة القران ان انت لما تقراه تحس بكل كلمة بتقراها وتشوف معنى جديد فى الاية انت مكنتش تعرفه قبل كدة ......سبحان المنان على عباده
ومن هنا تسمحولى طبعا بعد اذن هذة الاخت اولاوبعد اذنكم ثانيا اقترح موضوع نعمله فى المنتدى دةويكون اسمه(خواطر ايمانية فى كلام رب البرية)
وكل واحد مننا يكتب المعنى اللى خطر فى ذهنه وهو بيقرا الاية دى وانا متاكد ان شاء الله ان كل واحدمننا هيجيله الاحساس دة وهيجيله المعنى دة وهيكون كل واحد ان شاء الله خطر له فهم جديد للاية دى
ياعالم مش يمكن لما الواحد مننايذكر الخاطرة اللى خطرت له فى الاية دى وييجى واحد تانى يقرا كلامه ساعتها يخطر له الخاطرة دى وهو بيقرا نفس الاية فتزداد ايمانياته ويقرب لربنا اكتر بهمه للاية دى ساعتها يبقى كل دة فى ميزان حسنات صاحبنا اللى ذكر خاطرته دة.....سبحان الله
وياعالم مش يمكن يكون العمل دة كصدقة جارية يعنى اية؟
يعنى لما يتوفانا الله عز وجل بمشيئته وييجى بعدينا ناس يقروا الكلام دة ويتاثروا بيه ويتقربوا لربنا بالخواطر دى ياااااااااااااااااة ساعتها يبقى كل دة ان شاء الله فى ميزان حسناتنا رغم ان احنا ساعتها هيكون انقطع عنا العمل لكن سبحان الوهاب ياما ناس كتير انقطع عملهم بموتهم لكن لم ينقطع اجرهم بعملهم
نسال الله العلى القدير ان يجعلنا من هؤلاء والا يقطع عنا الاجر اذا ما انقطع عنا العمل فهو ولى ذلك والقادر عليه

مشكور يا أخ محمد على موضوعك واقتراحك
بس لو حضرتك تقصد ان كل واحد يقول المعنى اللي يخطر على باله فان المعنى ده ممكن يكون مخالف للمقصد الحقيقي للاية والله اعلم
فاقترح ان يكون في متابعة من مصادر التفسير الموثوق بها بعد ابداء الاراء

وبارك الله فيك وأثابك الجنة ونعيمها